Beth yw'r Ddogfen Gaffael Sengl Ewropeaidd? (ESPD)
Gwnaeth Cyfarwyddebau Caffael y DU ddarpariaeth ar gyfer cyflwyno Dogfen Gaffael Sengl Ewropeaidd y mae'r Comisiwn Ewropeaidd yn bwriadu ei defnyddio i ddileu rhywfaint o'r rhwystrau i gymryd rhan mewn prosesau caffael cyhoeddus, yn enwedig ar gyfer BBaChau.
Mae'r Ddogfen Gaffael Sengl Ewropeaidd yn hunanddatganiad o statws ariannol darpar gyflenwr, ei alluoedd a'i addasrwydd ar gyfer gweithdrefn gaffael gyhoeddus. Caiff ei defnyddio'n bennaf fel tystiolaeth ragarweiniol y caiff yr amodau sy'n ofynnol mewn gweithdrefnau caffael cyhoeddus eu cyflawni.
Nid oes rhaid i'r sawl sy'n cyflwyno cynnig bellach ddarparu tystiolaeth ddogfennol lawn na'r ffurflenni gwahanol a ddefnyddiwyd yn flaenorol ym mhroses gaffael yr UE, sy'n golygu bod y broses dendro yn symlach o lawer.
Bydd y Ddogfen Gaffael Sengl Ewropeaidd yn disodli'r gofyniad i gyflenwyr ddarparu tystiolaeth neu dystysgrifau ymlaen llaw gan eu galluogi i hunanddatgan eu bod wedi bodloni'r detholiad perthnasol a'r meini prawf gwahardd. Gellir gofyn i'r sawl sy'n cyflwyno cynnig ddarparu tystiolaethol o hyn nes ymlaen a bydd angen i'r cynigydd llwyddiannus fel arfer ddarparu tystiolaeth cyn y gellir dyfarnu'r contract.
Sut y bydd y broses newydd yn gweithio?
Bydd prynwyr yn pennu eu meini prawf dethol a gwahardd, gan gynnwys unrhyw safonau gofynnol a dulliau ar gyfer llunio rhestr fer yn eu hysbysiad contract. Yna, byddant yn cyflwyno cais am Ddogfen Gaffael Sengl Ewropeaidd a sicrhau ei bod ar gael i unrhyw un sydd â diddordeb mewn cyflwyno cynnig ar gyfer y contract.
Bydd cynigwyr yn llunio ac yn cyflwyno eu hymateb i'r Ddogfen Gaffael Sengl Ewropeaidd i'r prynwr, a fydd yn asesu addasrwydd pob cynnig yn erbyn y meini prawf a ddewiswyd ganddynt.
Beth am Holiaduron Dethol?
Bydd y Ddogfen Gaffael Sengl Ewropeaidd yn cynnig dewis amgen i'r holiadur dethol, a dylai'r broses o wneud cais am gontract fod yn haws. Ei diben yw dileu rhywfaint o'r rhwystrau sy'n gysylltiedig â pharatoi ar gyfer caffael cyhoeddus, yn enwedig ar gyfer BBaChau nad oes ganddynt, yn aml, yr adnoddau (amser/arian) i gwblhau dogfennau tendro cymhleth.
Roedd y dull Holiadur Dethol yn boblogaidd am fod prynwyr yn dueddol o ofyn cwestiynau yn yr un ffordd neu'n debyg. Bydd y Ddogfen Gaffael Sengl Ewropeaidd yn adeiladu ar hyn gan fod yr un ffurflen safonol bellach yn cael ei defnyddio ledled Ewrop
A fydd yn rhaid cyflwyno Dogfen Gaffael Sengl Ewropeaidd newydd ar gyfer pob tendr?
Caiff yr un set o gwestiynau ei defnyddio ledled y UE, felly bydd cynigydd yn gallu ail ddefnyddio ffurflen a gafodd ei chyflwyno yn flaenorol ar gyfer cystadleuaeth ar wahân, cyhyd ag y bydd y wybodaeth yn dal yn gyfredol.
Fodd bynnag, bob tro y bydd cyflenwr yn cyflwyno cynnig, bydd yn rhaid cyhoeddi Dogfen Gaffael Sengl Ewropeaidd hefyd. Bydd o fudd i'r cyflenwr ffurfweddu pob Dogfen Gaffael Sengl Ewropeaidd er mwyn gweddu â gofynion yr ymarfer caffael unigol hwnnw.
Sut y caiff y Ddogfen Gaffael Sengl Ewropeaidd ei gwirio i sicrhau cywirdeb?
Yn ôl y gyfraith, mae'n rhaid i'r cynigydd llwyddiannus gyflwyno'r holl dystysgrifau a'r dogfennau sy'n ofynnol, cyn y gellir dyfarnu contract iddynt. Gellir hefyd gofyn i gynigwyr gyflwyno eu tystiolaeth ar unrhyw adeg yn ystod y broses gaffael os bydd angen hyn er mwyn sicrhau y caiff y broses ei chynnal yn gywir.
Os bydd cynigydd wedi camliwio ei hun, gall rhywfaint o bethau ddigwydd, yn dibynnu ar natur y camliwio.
- Os bydd cynigydd yn torri rheolau un o'r meysydd sy'n sail orfodol ar gyfer gwahardd, neu os nad yw'n bodloni'r un o'r meini prawf dethol gofynnol, yna, mae'n rhaid gwahardd y cynigydd hwnnw o'r gystadleuaeth. Yn dibynnu ar natur a cham y gystadleuaeth, gall hynny olygu naill ai y bydd yn parhau heb y cynigydd hwnnw, neu y dylid ail gynnal y gystadleuaeth heb dendr y cynigydd hwnnw.
- Os bydd yn dod i'r amlwg bod busnes yn torri rheolau maes sy'n sail ddewisol ar gyfer gwahardd, yna yr awdurdod prynu fydd yn penderfynu p'un a ddylid gwahardd y cynigydd hwnnw ai peidio. Rhaid i'r penderfyniad hwn gael ei wneud yn unol ag Egwyddorion Cytundeb y DU o ran tryloywder, cymesuredd, triniaeth gyfartal a pheidio â gwahaniaethu.
- Os bydd y mater yn fwy gweinyddol ei natur (e.e. camgymeriadau o ran darparu'r ddogfennaeth), yna bydd gan yr awdurdod yr opsiwn o wahodd y cynigydd i wneud addasiadau, neu egluro'r ddogfennaeth a ddarparwyd.
A fydd y Ddogfen Gaffael Sengl Ewropeaidd yn effeithio ar is-gontractwyr?
Os bydd cynigydd yn dymuno is-gontractio fel rhan o gontract, ac yn dibynnu’n llwyr ar yr is-gontractwr er mwyn bodloni'r meini prawf dethol, rhaid i Ddogfen Gaffael Sengl Ewropeaidd ar wahân gael ei chyflwyno ar ran yr is-gontractwr.
Gall yr awdurdod prynu ddewis gofyn am Ddogfen Gaffael Sengl Ewropeaidd ar wahân gan unrhyw is-gontractwr arall, er mwyn cadarnhau p'un a oes seiliau ar gyfer ei wahardd ai peidio. Os bydd is-gontractwr mewn sefyllfa lle y byddai'n arwain at waharddiad gorfodol, bydd gofyn i'r cynigydd ddefnyddio is-gontractwr arall yn ei le. Mae'n bwysig iawn bod y cyflenwyr yn cynllunio ar gyfer y sefyllfa hon yn gynnar yn y broses drwy ymgysylltu ag is-gontractwyr a chael gwybodaeth yn gynnar yn y broses gaffael.
Dogfen Gaffael Sengl Ewropeaidd neu Holiadur Dethol?
Gall fod rhywfaint o ddryswch yn ystod y cyfnod pontio o'r Holiadur Cyn-gymhwyso (PQQ) Safonol i'r Holiadur Dethol i'r Ddogfen Gaffael Sengl Ewropeaidd. O 26 Medi 2016, dylai cyflenwyr ond dderbyn (ar y cyfan) yr Holiadur Dethol ond mae ganddynt hawl i gyflwyno Dogfen Gaffael Sengl Ewropeaidd os oes ganddynt un eisoes.
Cyhoeddwyd gyntaf
04 Ebrill 2018
Diweddarwyd diwethaf
07 Mawrth 2024