System Brynu Ddeinamig Ymchwil a Mewnwelediadau ar gyfer Contractau Ymchwil Llywodraeth Cymru – Diwe

Mae Llywodraeth Cymru yn parhau i annog cyflenwyr allweddol yn y categori Ymchwil, gan gynnwys pob prifysgol, i wneud cais i gofrestru gyda System Brynu Ddeinamig Ymchwil a Mewnwelediadau Gwasanaeth Masnachol y Goron sy'n darparu ymchwil i gyrff cyhoeddus ledled y DU. Lle bo'n briodol, byddwn yn tendro ar gyfer yr holl ofynion ymchwil gwerth dros £25,000 drwy'r system hon hyd nes y daw i ben ym mis Rhagfyr 2025 a byddem yn annog eich sefydliad i gofrestru gyda'r system fel nad ydych yn colli'r cyfle i wneud cais am ein contractau. Gellir dod o hyd i fanylion am sut i gofrestru mewn Erthygl Newyddion flaenorol.

I'r rhai sydd â diddordeb mewn cymryd rhan, rydym wedi cyhoeddi dros 70 o gystadlaethau yn ôl y gofyn, gyda chontractau'n amrywio o £25,000 i £2m i gefnogi holl feysydd polisi Llywodraeth Cymru. Mae enghreifftiau o'r contractau a ddyfarnwyd hyd yn hyn yn cynnwys:

Gwerthuso'r Cynllun Peilot Incwm Sylfaenol

Astudiaeth Ddichonoldeb ar gyfer Cyfleuster Cynhyrchu Radioisotopau

Ymchwil gyda Phreswylwyr Adeiladau Amlfeddiannaeth

Seibergadernid ym maes Addysg

Arolwg Ymwelwyr Cymru

Ymgynghoriad ar Sgiliau'r Sector Sero Net

Mae Llywodraeth Cymru yn bwriadu defnyddio'r system ar gyfer y gofynion canlynol sydd ar y gweill dros y 3 i 6 mis nesaf:

C059/2024/2025 - Gwerthusiad: Gweithgareddau Atgyweirio ac Ailddefnyddio – hyd at £90,000 (heb gynnwys TAW) – Haf/Hydref 2024

C042/2024/2025 - Gwerthusiad Proses o Gyllid Ysgolion Bro (I'w gadarnhau) – hyd at £100,000 (heb gynnwys TAW) – Contract 10 mis – Hydref 2024

C074/2024/2025 - Adolygiad o Gynaliadwyedd Cyllid Iechyd Tymor Canolig a Hir yng Nghymru – hyd at £100,000 (heb gynnwys TAW) – Contract 9 mis – Hydref 2024

Os oes gennych unrhyw gwestiynau pellach, cysylltwch â mi drwy gerrard.oneill@llyw.cymru